Ambatondrazaka – Voasambotra ny jiolahy mpitana moara
Tamin’ny alalan’ny vaovao avy amin’ny olona tsara sitra-po no nahatratraran’ny mpitandro filaminana ao Morarano Kraoma Ambatondrazaka ny jiolahy raindahiny. Ity farany dia efa fanta-daza amin’ny halatra sy fanaovana taratasy sandoka. Efa fantatry ny zandary mialoha fa manana basy mahery kalaky ity olon-dratsy ity. Tsy hita tao an-tranony anefa io fitaovam-piadiana io nandritra ny fisavana natao fa moara lehibe iray sy ny fitomboka sandoka no hita tao. Rehefa nofinihina ireto fitomboka ireto dia fantatra fa sandoka ary nakana tahaka ny an’ny fokontany, kaominina ary zandarmaria any an-toerana. Araka ny fantatra dia io fitaovana io no fanaovan’ity jiolahy ity ny taratasy sandoka. Ny mpivarotra sy mpividy omby ao Tsaratanàna, no tena ataony lasibatra.
Ity jiolahy ity dia efa nokarohina tamin’ny taon-dasa iny noho ny halatra vary milanja iray taonina.
Laurena Nany