Ny tolakandron’ny zoma lasa teo no nisehoan’izany, tamin’ny 3ora sy sasany tao amin’ny tananan’Ankariera, amin’iny lalam-pirenena faha-5 iny. Lehilahy 40 taona any ho any no maty tsy tra-drano nofaohin’ny fiara marika Mazda. Nandeha tongotra nanaraka sisin-dalana ity lehilahy raha nodomin’ilay fiara avy any afara. Nirimorimo mafy ilay fiara ka tsy nahatazona ny familiana intsony hany ka nifaoka ilay rangahy araka ny voalaza ny loharanom-baovao.

Vao nahita ilay rangahy nitsirara teo amin’ny tany ilay mpamily dia tsy nijanona fa nandositra avy hatrany ary tsy misy ahafantarana ny momba azy sy ilay fiara nentiny. Tahotra ny iharan’ny fitsaram-bahoaka angamba!!!

Natolotra ny havany ilay razana rehefa avy nozahan’ny dokotera sy ny mpitandro filaminana.

Efa mandeha kosa ny fikarohana ilay mpamily. « Ny tsy fandraisana andraikitra nataon’ilay mpamily fotsiny dia ampy hampigadra azy », hoy ny loharanom-baovao akaiky ny mpitandro filaminana.  « Ny tokony nataony dia ny mitolo-batana mba hampihena ny sazy miandry azy sy mba hialana amin’ny fitsaram-bahoaka », hoy hatrany ity mpitandro filaminana ity.

Laurena Nany