Nandritra ny fifanjevona nisy teo amin’ny polisy sy ireo jiolahy mpanakan-dalana tany Tsaratanàna dia polisy iray no maty voatifitra raha olona telo hafa naratra mafy, ao anatin’izany ny kaomisera sy ny sivily iray izay tafara-dalana tamin’izy ireo. Ny alatsinainy tamin’ny 11ora atoandro no nisehoan’izany tao Berere, 50 kilometatra tsy hiditra an’i Tsaratanàna. Polisy avy namita iraka tany Mampikony izy ireo izao nosakanan’ny jiolahy izao rehefa niverina, araka ny vaovao voaray. Vao nahatazana azy ireo avy lavitra ireo olon-dratsy dia nanapoaka basy avy hatrany. Raikitra ny fifampitifirana tamin’io fotoana io saingy lany ny balan’ireo mpitandro filaminana ka voatifitra tamin’ izany ny polisy iray, ka nitarika ny fahafatesany.

Ilay kaomisera kosa voa teo amin’ny kibony ary nahitana diam-bala miisa efatra ary nisy ihany koa teo amin’ny lohany. « Tsy nisy zavatra lasan’ireo jiolahy tany amin’ireo polisy fa vola mbola tsy fantatra kosa ny isany no lasa tamin’ilay sivily », hoy ny tale jeneralin’ny polisim-pirenena. Ireo naratra nandritra ny fanafihana dia fantatra fa efa manaraka fitsaboana ao amin’ny hopitaly ao Mahajanga.

Laurena Nany