“Tokony ho mailo ny tsirairay ary mila mijery tsara izay vola raisina”, hoy ny polisy ao Mahajanga manoloana ny fiparitahan’ny vola sandoka any an-toerana. Nanomboka ny fiandohan’ity herinandro ity mantsy  dia efa miisa roa ny olona tratra ny polisy. Ny harivan’ny talata dia lehilahy iray nampiasa vola sandoka no efa  eo am-pelatanan’izy ireo rehefa sarona nandritra ny fividianana zavatra tamin’ny toeram-pivarotana iray. Nampandre ny polisy avy hatrany mantsy ireo mpivarotra raha nahatsikaritra fa vola sandoka ireo noraisiny. 10 000 ariary iray no nampiasain’ilay olon-dratsy ary rehefa nosavaina io lehilahy io tamin’ny fidinanan’ny mpitandro filaminana tao amin’io fivarotana io dia mbola nahitana 10 000 ariary telo hafa teny aminy.

Mitohy ny fanadihadiana ataon’ny polisy amin’ny fitadiavana ny tena ati-doha mpambotry ny firenena. Araka ny fantatra dia mbola iraka daholo ireo olona tratra ireo mba hanaparitaka io vola sandoka io. Efa misy ihany koa ny famitahana ny olona amin’ny fanakalozana ny vola izay ampitomboina dimy avo hena ary betsaka ireo tafaroboka amin’izany. Efa nisy mantsy ny olona voafitaka nankan’ireo olon-dratsy vola hatramin’ny 1 000 000 ariary lazaina fa atakalo 5 000 000 ariary.

Laurena Nany