Lohahevitra tamin’ity taona ity ny hoe : « Fitsarana tsara tantana, antoky ny fampandrosoana ». Nisokatra ny talata maraina tamin’ny fomba ofisialy, tao amin’ny « Hôtel Amazone » Toliara, ny fivoriamben’ny lehiben’ny fitsarana avy amin’ny fitsarana ambony ao Toliara sy Fianarantsoa. Fihaonambe notanterahina in-telo miantona mifampitohy nanomboka ny taona 2012, ka nofakafakaina tamin’izany ny hoe : « Lehiben’ny fitsarana : voninahitra sy haja, adidy aman’andraikitra sy fitsarana matanjaka, tsara tantana, manome fahafaham-po ireo manan-draharaha eny amin’ny fitsarana ary fatra-panaja ny zon’olombelona ».  « Ny fahaiza-mitantana, ny ady amin’ny kolikoly ary fanatsarana ny fahaiza-manao ao amin’ny fitsarana, izay politikam-panjakana amin’izao, mitaky ny kolon-tsain’ny vokatra, dia antoka iray mampandroso ny firenena eo amin’ny lafiny rehetra », hoy Razafinjatovo Honoré Parfait, tale jeneraly « programme et ressource » anivon’ny ministeran’ny fitsarana, nisolo tena ny minisitry ny Fitsarana tany Toliara. « Havoitra mandritra ny telo andro amin’ity atrikasa fikaonan-doha sy fifanakalozan-kevitra ary fifampizarana traikefa ity ny fiahiana ireo tsy manam-bola amin’ny fiarovana ny zony eny amin’ny fitsarana sy ny fanafainganana ny fandinihana ny antontan-taratasin’ireo manan-draharaha mba hisian’ny fifaneraserana tsara hanarenana ny lesoka, mamerina ny fitokisan’ny vahoaka ny fitsarana », hoy kosa ny filoha voalohan’ny fitsarana an-tampony eto Madagasikara, Randrianantenaina Modeste, raha nanamafy.

Eric Toliara