Halatra lavanila maitso – Roa lahy matin’ny fitsaram-bahoaka
Na efa misokatra aza ny tsenan’ny lavanila any amin’iny Faritra Sava iny dia fantatra fa mbola mitohy ny halatra lavanila manta na maitso izay ataon’ireo olon-dratsy any an-toerana. Tafakatra any amin’ny 50.000 ariary ny kilaon’ny lavanila manta any Sava ka izay no mampirongotra ny halatra amin’izao. Tsy voafehin’ny mpitandro filaminana intsony ireo mpanao ratsy hany ka mila ho potiky ny mpangalatra ny seha-pihariana lavanila any amin’iny faritra iny.
Ny alin’ny alakamisy 23 jolay dia valo lahy no fantatra fa nangalatra lavanila manta tao amin’ny fokontany Ambalamanasy, tao amin’ny distrikan’i Andapa. Rehefa nifanenjehan’ny fokonolona dia tratra ny roa lahy tamin’izy ireo ka maty niharan’ny fitsaram-bahoaka. Raha ny tatitra voaray dia tsy tana intsony ny ain’izy ireto rehefa tonga tany amin’ny hopitaly na dia nifamonjen’ny mpitandro filaminana aza. Voasambo-belona kosa ny naman’izy ireo iray ary efa eo am-pelatananan’ny mpitandro filaminana. Efa mandeha kosa ny fikarohana ny dimy ambiny amin’izao fotoana izao.
Laurena Nany