Mirongotra ny tsy fandriampahalemana any Anjozorobe. Manao haza lambo mihitsy ireo dahalo amin’ny fandrobana ny fananan’olona. Tsy vitan’ny mandroba fa mbola mamono koa ireo dahalo ary tena tsy mikoso maso.

Zazakely 5 taona monja no namoy ny ainy voatifitra tao Antsapandrano, ao amin’ny fokontany Ambohijavona, kaominina Antanetibe, any amin’ny distrikan’i Anjozorobe ny harivan’ny alahady 26 jolay tamin’ny 5ora. Dahalo roapolo mahery nirongo basim-borona no tonga masiaka tao amin’io toerana io nandroba ny ombin’ny mpamboly iray monina ao. Tifitra variraraka no nidiran’izy ireo tao an-tanàna ary nandritra izany no nahafaty an’ilay zanaky  ny tompon’omby izay voan’ny balan’ireo dahalo sy ny omby iray. Lasa ihany koa ny omby miisa 27.

Rehefa niala ny tanàna dia nalain’izy ireo an-keriny ny renin’ilay zaza mba hampizotra ny fivoahan’ireo tsy mataho-tody tamin’ny toerana notafihany. Nampandre ny mpitandro filaminana ny lasibatra ary efa mandeha ny fanarahan-dia ankehitriny izay manaraka ny dian’omby mizotra any amin’ny distrikan’i Ankazobe.

Laurena Nany