Ny marainan’ny omaly no noraisin’ny minisitry ny Filaminam-bahoaka, ny Inspektera jeneralin’ny polisy Randimbisoa Blaise Richard ny ekipa nasionaly Tenisy ambony latabatra izay hiatrika ny lalaon’ny Nosy atao atsy La Réunion ny 01 ka hatramin’ny 09 Aogositra 2015 ho avy izao. Folo mianadahy ireo mpilalao mandrafitra ny ekipa miaraka amin’ny mpanazatra roa hanainga amin’izany toerana izany hiaro ny voninahitr’i Madagasikara.

Amin’ny maha-mpiahy ny taranja tenisy ambony latabatra an’Andriamatoa Minisitra dia nitso-drano azy ireo ny tenany mba hotojo fahombiazana amin’ny lalao izay atao any. Nisy ihany koa ny vatsin-dàlana ho azy ireo. Nandray ny tso-drano ny tale jeneralin’ny polisim-pirenena, ny contrôleur jeneralin’ny polisy Rajaobelina Joachim ny talata 28 jolay teo ihany koa ireo atletisma sokajy « senior » avy amin’ny Cospn.

Efatra mianadahy izy ireo no handeha hiatrika ny lalaon’ny Nosy. Nitso-drano mba haleo hahalasana ary hahavita be amin’ny andraikitra sahanin’izy ireo mba hiaro ny voninahitry ny polisim-pirenena fa indrindra indrindra ny voninahitry ny firenentsika. Nisy ihany koa ny vatsin-

dàlana natolotra azy efatra mianadahy ho fanohanana azy ireo.

Laurena Nany