Mitohy ny ady amin’ny famongorana ny fiparitahan’ny kapila mangirana hosoka. Tamin’ny alalan’ny vaovao avy amin’ny olona tsara sitra-po dia saron’ny borigady misahana ny ady amin’ny  hosoka ny tovolahy iray mivelona amin’ny fanaovana ny Cd hosoka.

Tamin’ny fidinana nataon’ny mpitandro filaminana tamin’ny trano fonenany dia sarona tao ireo fitaovana fampiasain’ity tovolahy ity amin’ny fikirakirana ireo kapila mangirana ireo, toy ny solosaina, ny rano mainty, « Imprimante » ary kapila mangirana mbola tsy niasa aman-jatony.

Nosamborina avy hatrany izy ary nentina natao famotorana teny amin’ny biraon’ny borigady misahana ny ady amin’ny hosoka. Tamin’ny famotorana natao taminy dia efa herintaona mahery no nanaovany an’io asa io izay amelomany ny vadin-aman-janany. Tamin’ny filazany dia ireo mpivarotra ireo kapila hosoka ireo no mamatsy Cd azy fa izy kosa manatanteraka izany. Nandritra ny fanadihadiana hatrany no nahalalan’ny mpitandro filaminana ireo namany izay mpikirakira ity hosoka ity ihany koa. Efa mandeha ny fikarohana ireo anaran’olona ireo ary nogiazan’ny mpitandro filaminana kosa ireo fitaovana ireo.

Laurena Nany