Tsy mahagaga noho izany raha maro ireo olon-tsotra no te hanao ny asan’ny mpitandro filaminana sy ny fitsarana. Tsy mionona amin’ny fampilazàna ny polisy sy zandary mantsy izao ny ankamaroan’ny vahoaka fa avy hatrany dia misambotra izay heveriny ho olon-dratsy ka resiny. Tsy manatrika izany eny amin’ny mpitandro filaminana ihany koa fa avy hatrany dia misalovana ny andraikitry ny fitsarana. Misy sokajin’olona lian-dra avy hatrany dia manapa-kevitra fa hovonoina ho faty tsy mandalo fitsarana akory ireo heverina ho meloka na misy porofo na tsy misy. Zava-doza io tranga iray io satria efa maro ihany ireo tsy manan-tsiny matimaty fahatany noho ny fitsaram-bahoaka. Hatramin’ny mpitandro filaminana polisy sy zandary izay manao ny asany aza dia efa nisy ireo namoy ny ainy novonoin’ny fokonolona. Ny tena mahagaga dia misy tompon’andraikitra sy olon-dehibe eny an-tanàna tena mankasitraka sy mamporisika ny fitsaram-bahoaka izay efa iaraha-mahalala fa heloka bevava.

Na ny fitantanana ny raharaham-pirenena aza dia efa marobe ireo hita fa te hisalovana ny andraikitry ny hafa. Io antony io no mahatonga ny ankamaroan’ny mpanao politika mitaky ny fanovàna governemanta. An-jatony maro ireo mpanao politika no te haka ny toeran’ny minisitra amin’izao fotoana izao ary manao ny fomba rehetra hanerena ankolaka ny filoha mba handrava ny governemanta. Izay ihany mantsy no fomba mahomby indrindra hahafahan’ireo tia seza maka toerana eo anivon’ny fitondram-panjakana. Ny antoko mpanohitra izay tsy te hiditra ao amin’ny fitondrana kosa dia manao ny fomba rehetra handabohana ny Fanjakana mijoro amin’izao fotoana izao. Fitsiriritana seza sy fitadiavan-toerana avokoa. Ny fandrodanana ny fitondrana anefa no fomba hahafahana misalovana ny andraikitr’ireo manam-pahefana ankehitriny.

Tsy handroso mihitsy ity firenena ity raha samy te hitsabaka amin’ny asa aman-draharahan’ny hafa ny tsirairay. Ny eo am-bilia tsy lany nefa ny any am-bilany takarina. Io no tena hahafahana manintona ny zava-misy amin’izao fotoana izao. Mifanenjika ny hanao ny asan’ny hafa ny rehetra nefa vao mainka izany manimba zavatra. Mila miverina amin’ny fanajana ny andraikitra tandrify azy ny Malagasy fa raha mitohy ny zava-misy amin’izao fotoana izao dia hihemotra lava eto ity firenena ity.

Ravalo tsy Manana

Mora ny mitsikera ny mpanongam-panjakana nefa misy antony ny mahatonga izany rehetra izany dia ny tsy fanajana ny demokrasia sy ny fahalalahana haneho hevitra. Eken’ny rehetra fa ny fifidianana irery ihany no fomba demokratika hahafahana maka fitondrana saingy kosa rehefa lalaovin’ny mpitondra Fanjakana io fifidianana io dia tsy azo antoka intsony. Izany hoe rehefa mahita ny mpanohitra fa tsy mahomby amin’ny fifandimbiasam-pahefana intsony ny fifidianana dia voatery izy ireo miditra amin’ny hetsika natao handrodanana izay mpitondra eo aloha. Tsy azo hadinoina fa ireo mpitondra Fanjakana niongana teto dia nandresy tamin’ny isam-bato mazava avokoa tamin’ny fotoana nahatongavany teo amin’ny fahefana. Tsiranana dia nahita isam-bato ambony dia ambony tamin’ny niongana, Ratsiraka ihany koa dia nandresy mazava tamin’ny fifidianana talohan’ny grevy 1991 ireny ary Ravalomanana dia vao avy nandresy ny “1er tour” dia vita talohan’ny nionganany tamin’ny 2009.

Raha ny lojika no jerena dia tsy tokony hiongana izany ny olona vao avy nandresy tamin’ny isa mazava nandritra ny fifidianana demokratika. Zavatra roa izany no mety ho antony. Voalohany dia tena tsy nahay nitantana ilay filoha ka tofoka ny vahoaka. Faharoa kosa dia tsy nitombina ny voka-pifidianana izay nandreseny. Izany hoe tsy azo ambara ho tena demokratika ilay fifidianana nokarakarainy ka tsy neken’ny maro.

Anisan’ny antony iray mampipoaka ny hatezeram-bahoaka ihany koa ny fanagejana ny fahalalahana hiteny. Ireo filoha niongana tamin’ny fotoan’androny dia samy nanao izay fomba rehetra hatramin’ny fampiasan-kery mba tsy hamelana ny vahoaka sy ny mpanao politika avy amin’ny mpanohitra hiteny. Toy ny amin’izao fotoana izao mihitsy raha atao ny fampitahana. Lazaina fa misy demokrasia sy fahalalahana eto Madagasikara nefa tsy azo anaovana hetsika politika ankalamanjana. Tsy mety manome alalana na iza na iza avy amin’ny antoko mpanohitra mba hamory sy hitafa mivantana amin’ny vahoaka ny manam-pahefana amin’izao fotoana izao. Efa niarahan’ny rehetra nahita tsara fa mpitandro filaminana an-jatony no avoaka handrava ny hetsika sy hanao ny fisamborana ary hanagadra izay miseho ho mafiloha tsy azo raràna. Resa-be fotsiny izany demokrasia izany eto Madagasikara.

Ravalo tsy Manana

Ravalo tsy Manana

Hita ihany koa hatramin’ny fiandohan’ny taona fa ampahany vitsy amin’ireo minisitra ihany no tena mihetsiketseka sy miezaka ny hanao izay hanatsarana endrika ny fitondrana eo anatrehan’ny vahoaka. Matetika dia mizara telo ny mpitondra Fanjakana rehefa manao hetsika ka ny ekipa voalohany dia tarihin’ny filoham-pirenena, ny faharoa miaraka amin’ny praiminisitra ary ny fahatelo dia miara-dia amin’ny minisitry ny fanabeazam-pirenena. Ireo ekipa telo ireo ihany no tena hita fa miezaka mafy mampiseho fa miasa sy mahita vokatra ho an’ny vahoaka ny mpitondra Fanjakana ankehitriny. Ny hafa kosa dia tsy hita mihitsy izay tena hataony fa toa mangingina na mipoitra ihany fa resa-be no betsaka.

Tonga amin’ny kihon-dalana tsy maintsy handraisana fanapahan-kevitra ny filoham-pirenena noho izany rehetra izany. Roa ny safidiny dia ireto : voalohany mitazona ny Governemanta ankehitriny nefa kosa tsy maintsy manao izay handaminana sy hampirindrana ny fifandraisana sy ny fiaraha-miasan’ireo minisitra rehetra. Ny faharoa kosa dia ny fanovàna ny Governemanta amin’ny alalan’ny fanesorana sy fanoloana ireo minisitra hita fa tena tsy mahomby mihitsy.

Sarotra ihany ny toe-draharaha satria mariky ny fanekena ny tsy fahombiazana ny fanovàna Governemanta isan-taona. Mampiseho ihany koa fa tsy marin-toerana ny asa fampandrosoana sy ny fomba fitantanana ny firenena. Ankoatra izany dia tsy misy antoka mazava fa ho afaka ny hahomby noho ny amin’izao izany izay olona ho voatendry manaraka eo. Ny mpitady toerana rahateo efa miandry kendry tohana fotsiny ary maro ireo mpanao politika no manao izay fomba rehetra hahazoana seza ka mody manasohaso ny fitondram-panjakana nefa rehefa tena tafiditra ao dia toa lasa mamingana avy ao anatiny indray. Tena ho sarotra izany fanovana governemanta izany satria raha hanakaton-trano hiaraka amin’ny Hvm dia vao mainka hampitombo ny isan’ny mpanohitra sy ireo mihataka ny handrodanana ny fanjakana mijoro. Raha hisokatra amin’ny firenena hafa anefa dia sarotra ny hifehy izay olona hotendrena avy amin’ny antoko politika hafa.

Ravalo tsy Manana

Tsara tokoa ireo fiarbe fitateram-bahoaka ary tena raikitra sy manaraka ny fenitra takian’ny vanim-potoana ankehitriny saingy toy ny tsy misy ihany izy ireny raha mbola tsy afaka hitaingenan’ny vahoaka. Rehefa nampahafantarina dia tokony ho azo ampiasaina avy hatrany fa tsy mbola hiandry fivoriana sy fifampidinihana ary fakan-kevitra etsy sy eroa izany. Bus mbola tsy hiasa akory no ireharehana sy dokadokafana. Tsy fomba fiasa toy izany no ilain’ny vahoaka fa vokatra mivaingana sy misy fiantraikany amin’ny andavanandrom-piainan’ny mponina. Rehefa manolotra dia tena manolotra fa tsy mampilendalenda na manome tsy foy foy. Tetikasa efa masaka no ilain’ny Malagasy fa tsy fiara fitaterana mbola itadiavana mpividy.  Tamin’ny andron’ny fitondran’ny Filoha Didier Ratsiraka dia efa nitobaka sy niasa teto an-drenivohitra ny Antafita vao gaga ny ankamaroan’ny olona hoe nisy kaoperativa vaovao nanampy ny Fibata sy ny Fima. Tsy nisy an’izay hoe naseho aloha ireo fiara dia mbola hiaraha-midinika ny fomba hampiasana azy toy ny amin’izao fotoana izao. Toa lasa ankandasotra fotsiny sisa ny asa fampandrosoana sy ny fampanantenana fa tsy miroso amin’ny tena fampiharana azy.

Ankoatra izany dia efa maro sahady ny manahy ny fikorontanan’ny fifamoivoizana aterak’ireo fiarabe ireo raha tahiny ka tena hiasa eto an-drenivohitra tokoa izy ireo any aoriana any. Iaraha-mahafantatra mantsy fa tery dia tery ary efa tsy maharaka ny isan’ny fitaovam-pitaterana mifamezivezy intsony ny lalana eto Antananarivo. Ny afitsoky ny taxibe sy ny taxi, ny skotera ary ny posy sy sarety aza efa tsy hita izay hanaovana azy. Angamba dia asa fotsiny ny fitohanana eto raha toa ka misy am-polony maro amin’ireo bus be vaovao ireo hiasa eto. Raha ny fanazavan’ny teknisianina amin’ny fandrindrana ny fifamoivoizana dia tsy mahazaka handray karazam-pitaterana hafa intsony ny lalana eto Antananarivo. Izany antony izany no antony hamerana ny fivezivezen’ireo kamiao sy posy ary sarety mba tsy hanelingelina be loatra ny fifamoivoizana amin’ny fotoana mahabetsaka ny fiara. Io antony io ihany koa no nametrahana lalàna mifehy ny fiantsonana sy ny fijanonan’ny taxi sy ny taxibe. Ankoatra izany dia efa nisy mpandraharaha nangataka ny hampiditra ireo fiara kodiaran-telo Bajaj hanao fitaterana eto an-drenivohitra fa tsy mbola nahazo fankatoavana noho ny fahasarotan’ny fandrindrana ny fifamoivoizana.

Izao anefa dia ny fiadidiana ny Repoblika mihitsy no nampiditra ny tetikasa hampiasana bus be eto Antananarivo. Eto akory tsy toy ny any Sydney na Paris, na ihany koa Californie izay manana lalam-be mikodana azon’ny fiara 3 indray milahatra ka ahatonga ny bus be tsy manelingelina ny hafa. Ny eto an-drenivohitra dia tena tery dia tery ny lalana ary tsy mahazaka fiara lehibe mifanena izany intsony. Be tetika fotsiny nefa kely lalana.

Ravalo tsy Manana

Na izany aza ve dia ho voatery hanao fikomiana foana ny vahoaka malagasy vao mba afaka ny hisitraka ny zony ? Tsy sitrapon’ny ny vahoaka ny hitokona saingy rehefa tena mihoatra ny zakan’ny aina ny zava-misy dia tsy maintsy tonga amin’ny fihetsiketsehana ihany ny fitakiana sy ny fitarainana. Ankoatra ny delestazy mantsy dia mbola anisan’ny fery mikiky ny vahoaka ihany koa ny resaka tsy fandriam-pahalemana. Miha mahery vaika ary mivadika biby araka ny fomba fiteny mihitsy mantsy ny mpanao ratsy amin’izao fotoana izao. Vao tamin’ity herinandro ity izao no nisy mpampianatra vehivavy sady mitondra vohoka naolana sy novonoina ho faty. Tovolahy hafa ihany koa no sady voaendaka no maty voatsindron’antsy teny Ambanidia. Ankoatra ireo dia saika ho isan’andro no ahenoana vonoan’olona sy fandrobana ary fanolanana amin’ny faritra maro manerana ny Nosy. Ny tranga toy izany no mahatonga ny Malagasy hiroso amin’ny fitsaram-bahoaka. Tena tsy ara-dalàna ary tsy eken’ny saina io resaka fitsaram-bahoaka io nefa zava-misy ary sarotra ny mamaha azy. Na dia manao fanentanana matetika sy miantso ny vahoaka tsy hiroso amin’izany aza ny manam-pahefana sy ny tompon’andraikitra isan-tsokajiny dia vao mainka mirongatra io fomba fanao ratsy io.

Raha ampy anefa ny fandraisana andraikitra manoloana ny tsy fandriam-pahalemana dia ho foana ho azy ny fitsaram-bahoaka. Raha voasambotra ny mpitandro filaminana ary voasazy mafy eo anatrehan’ny fitsarana ireo mpanao ratsy dia ho foana ho azy io fitsaram-bahoaka io. Matoa mantsy mitombo isa ny olon-dratsy dia tsy atahoran’izy ireo intsony ny sazy miandry azy raha voasambotra izy ireo. Hatreto aloha dia ny fitsaram-bahoaka ihany no sazy atahoran’ny mpamono olona sy mpanolana ary mpangalatra. Ankoatra ny maha fiarovan-tena azy dia maneho endrika fikomiana io fitsaram-bahoaka io satria fantatra izao fa tsy ara-dalàna nefa inian’ny fokonolona atao ihany. Misy endrika fanararaotana ihany koa ary efa miroso tsikelikely any amin’ny resaka fanakorontanana. Ny tena loza dia lasa ny vahoaka sy ny mpitandro filaminana indray no mifandramatra noho ny afitsoky ny olon-dratsy. Ny mpitandro filaminana manao izay hanajana ny lalàna ary ny vahoaka kosa mitaky ny hamonoana ireo nahavanon-doza.

Mbola betsaka ny ezaka tokony hataon’ny mpitondra Fanjakana eto Madagasikara mba hametrahana firenena mandroso sy fiarahamonina vanona. Tsy vitan’ny fitokanana efitranon-tsekoly sy ny fizarana fanomezana kely etsy sy eroa mantsy ny asa fampandrosoana fa mila ny fanatsarana ny fiainam-bahoaka amin’ny lafiny rehetra mihitsy.

Ravalo tsu Manana

Tsy ny resaka famatsian-jiro ihany koa anefa no andrasan’ny mponina fa sehatra maro amin’ny fiainana andavanandro no mila ezaka asa mivaingana ao anatin’ny fotoana fohy. Ho an’ny eto an-drenivohitra izao dia tena efa manomboka simba sy sarotra ampiasaina ny lalana rehetra. Maro ireo lavaka be eny afovoan’ny arabe nefa jerem-potsiny. Eo Soarano, amin’ilay lalana vao avy namboarina vao haingana kely iny ary misy vavan-tatatra tsy misarona nefa dia jerem-potsiny tsy misy manarona. Tena loza ho an’ny fifamoivoizana ireny lavaka be ireny satria ankoatra ny fitohanana aterany dia sady manimba fiara no mety hiteraka fandratrana olona mihitsy raha sanatria misy fiara latsaka ao. Andrasan’ny mpampiasa lalana noho izany ny fanamboarana ireny fotodrafitrasa simba ireny satria tena iankinan’ny fizotry ny andavanandrom-piainan’ny vahoaka mihitsy izany. Vitan’ny Fanjakana raha izay hanampina lavaka eny amin’ny arabe izany. Efa niaraha-nahita fa vetivety ireny lalana ireny dia voatampina raha tena te hanao ny mpitondra. Porofon’izany ny zava-nitranga talohakelin’ny frankofonia.

Ny fampidinana ny vidim-piainana ihany koa dia tena anisan’ny zava-dehibe andrandrain’ny vahoaka malagasy. Raha tena mitady vahaolana toy ny natao tamin’ny delestazy eto Antananarivo ny mpitondra dia antenain’ny maro fa hahita tetika hampidinana io vidim-piainana io. Ohatra iray manaporofo fa azo atao ny mahita vahaolana toy ny efa natao tamin’ny saran-dalana. Ireny niara-nijoro ireny fa tsy hanondrotra ny saran-dalana ireo mpanao fitaterana hita fa tena matianina. Ireo kaoperativa mitsipozipozy nefa tia tena sisa no miziriziry amin’ny Ar 500 nefa ny kalitaon’ny tolotra sy ny asa ataon’izy ireo tena  “aotra” raha asiana naoty. Mila ampidinina ihany koa ny vidim-bary sy laoka mba hahafahan’ny vahoaka misakafo ara-dalàna satria tena hita ny vesatry ny fahantrana sy ny tsy fahampiana amin’izao fotoana izao. Mila ezaka sy fandraisana andraikitra avy amin’ny fitondram-panjakana izany rehetra izany satria tena iankinan’ny fiainam-bahoaka mivantana. Tsara ny mizara fanampiana etsy sy eroa saingy tsara kokoa ny fanatsarana mivantana ny ara-tsosialy.

Raha te hisoroka ny tsikera sy ny fitokonana mitranga etsy sy eroa ny fitondram-panjakana dia ny famahana ny olam-bahoaka sy ny fanatanterahana ny hetahetan’ny mponina ihany no vahaolana tokana sy mahomby hanatanterahana izany. Izay rahateo no asa aman’andraikitra nankinina tamin’ireo mpitondra ary handraisan’izy ireo karama sy tombontsoa be ao anaty Fanjakana ao. Ny vahoaka malagasy dia anisan’ny vahoaka hendry ary tsy sarotiny firy amin’ny fitondran-tenan’ny manam-pahefana saingy kosa manantena ny fisian’ny vokatra mivaingana sy ny asa fampandrosoana.

Ravalo tsy Manana

Lasa resaka praopagandy politika fotsiny sisa ny fanamboaran-dalana eto Madagasikara. Ekena fa tena mitondra asa fampandrosoana tokoa ireny fotodrafitrasa ireny na nisy aza ireo nanely taloha fa tsy hanina ny lalana. Na izany aza dia hita ihany fa misy laharam-pahamehana hafa tena manahirana ny vahoaka amin’izao fotoana izao dia ny ara-tsosialy. Tena mahantra ny ankamaroan’ny isan-tokantrano ary manahirana hatramin’ny fitadiavana sakafo hivelomana isan’andro. Tsy mahagaga raha mitombo isa ireo mpatory an-tsena sy mpangataka eto an-drenivohitra. Tena vahoaka malagasy izy ireny fa tsy vahiny akory ary tsy azo odian-tsy hita. Olona nandositra ny fahantrana sy ny tsy fisiana tany amin’ny toerana nisy azy ireny mpatory sy mpirenireny eny an-tsena ireny ka niakatra ny renivohitra satria aty no misy ny mpitondra Fanjakana heverin’izy ireo fa azony ianteherana hamonjy azy. Ireny no antsoina hoe resy tanteraka ary porofon’ny fahantrana lalina mianjady amin’ny firenena. Ankoatra ny mpangataka sy ny mpitsindroka fako mba hivelomana anefa dia marobe amin’ny Malagasy no tena ao anatin’ny fahasahiranana noho ny tsy fisian’ny asa mahavelona. Tsy mahagaga raha mitombo andro aman’alina ireo mpanao asa tsy ara-dalàna satria tsy ampy ny tolotr’asa misy.

Tsapan’ny fitondram-panjakana ny fahasahiranan’ny vahoaka araka ny kabary averimberin’izy ireo. Manaporofo izany ny tetikasa fanaovana asa tana-maro sy ny fizarana fanomezana kely etsy sy eroa. Tsy hahavita taona anefa ireny ary tsy afaka hitondra fampandrosoana ho an’ny isan-tokantrano ihany koa. Mila asa ara-dalàna sy marin-toerana ny vahoaka mba tena hahafahany mandray anjara amin’ny tena asa fampandrosoana marina. Matetika ny mpitondra no manao antso mba hiarahan’ny rehetra mientana amin’ny fampandrosoana ny firenena nefa sarotra tanterahina izany raha tsy misy rafitra sy sehatra hahafahan’ny tsirairay mandray anjara. Tsy vitan’ny antso mantsy ny fifanomezan-tanana fa mila famoronana asa ihany koa. Mbola lavitr’ezaka anefa ny sehatry ny famoronana asa eto Madagasikara. Na misy fitomboany isan-taona aza ny antontan’isa mahakasika ny famoronana orinasa vaovao dia hita fa tsy matotra ny ankamaroany ary tsy maharitra ela no tsy misokatra ho an’ny hafa ihany koa. Saika karazana orinasa mitsipozipozy kely amin’ny sehatra fanelanelanana ara-barotra sy serasera no betsaka ary tsy maharitra roa taona akory ny ankamaroany dia mikatona.

Ravalo tsy Manana

Toa ela loatra anefa ilay fifidianana manaraka izay amin’ny taona 2018 raha haingana indrindra. Maro ny efa mihevitra sahady fa raha ny fomba fiasan’ny fitondram-panjakana amin’izao fotoana izao dia amin’ny 2019 any vao hisy ny fifidianana filoha manaraka. Tsy andrin’ny rehetra anefa izany satria ny firenena dia latsaka an-katerena tanteraka nefa tsy hita izay tena vahaolana aroso. Manaporofo izany ny fanovana matetika ny mpikambana ao amin’ny Governemanta sy ireo mpiasam-panjakana ambony ary ireo tompon’andraikitra lehibe amin’ny orinasam-panjakana. Hita ho tsy mahomby anefa io tetikady iray io satria isan-taona izao ve dia hanova governemanta hatrany. Lany andro amin’ny fanendrena sy fanesorana tompon’andraikitra ity fitondram-panjakana ity ka tsy mahavita asa mivaingana fa mionona amin’ny fikarakarana atrikasa sy fandrafetana tetikasa fotsiny sisa. Raha ny tena tokony ho izy mantsy dia herin-taona mahery kely eo ho eo sisa no fotoana fitondran’ny filoha ankehitriny dia hifarana. Inona avy anefa no asa fampandrosoana napetrany tao anatin’izay fotoana izay. Nisy fa kely ary tsy araka ny nampanantenaina. Raha atao ny fampitahana dia azo ambara fa miiba ny vokatra satria tsy mahafeno ny banga amin’ny fihemorana ny asa fampandrosoana napetraka. Nanamboatra lalana vitsivitsy ny fitondrana saingy tsy azo odian-tsy hita fa simba avokoa ny lalana hafa manerana ny Nosy. Porofo akaiky maneho izany ny eto an-drenivohitra. Vita tsara ny eny Soarano fa ankoatra io dia miverina avokoa ny lavadavaka rehetra manerana ny tanàna. Nametraka fotodrafitrasa famokarana herin’aratra vaovao nyf itondrana saingy io iaraha-mahita io ny delestazy izay mampiseho fa ny olona efa nanana jiro taloha aza lasa miaina ao anaty haizina hatramin’ny taona 2014. Napetraka ihany koa ny toby sy andian-tafika isan-tsokajiny hiadiana amin’ny dahalo nefa raha hampitahaina tamin’ny tranga talohan’ny taona 2014 ny tahan’ny tsy fandriam-pahalemana ankehitriny dia hita fa avo dia avo. Santionany kely amin’ny raharaha tsy manjary eto amin’ny firenena ireo noresahina ireo ary mahatonga ny tsy fisian’ny fifampitokisana eo amin’ny vahoaka sy ny fitondram-panjakana intsony. Izany antony izany no manery ny mpanao politika manam-piniavana hampandroso marina hihetsiketsika sahady amin’ny fanomanana ny fifidianana manaraka. Ary sao dia mba tokony haroso amin’ity taona ity tokoa ary io fifidianana amin’ny 2018 io hahafantarana izay tena tian’ny vahoaka marina?

Ravalo tsy Manana

Vahoaka milamina ny Malagasy ka na dia tsy takona afenina aza fa tsy mandeha araka izay nampanantenaina ny asa fampandrosoana sy ny fitantanana mahomby dia mbola manetry tena sy midiyra amin’ny lojikan’ny fihetsiketsehana ny ankamaroan’ny vahoaka. Anjaran’ny mpitondra izany sisa no manatanteraka ny asa fampandrosoana nampanantenainy. Raha tsy vita izany dia tsy manana fialan-tsiny intsony izy ireo fa tompon’andraikitra amin’izay zava-mitranga eo.

Mila manome vokatra tsara ao anatin’ny fotoana fohy, noho izany ny fitondram-panjakana satria misy fetrany ihany ny fandeferana sy ny faharetan’ny vahoaka. Raha sanatria mantsy tsy misy akory ny asa fampandrosoana dia mety ho feno koa ny fepetra hahafahan’ny vahoaka manao hetsika hanehoana ny fahadisoam-panantenany. Hatreto aloha dia toa kabary no tena betsaka fa tsy hita mihitsy izay tena fiovana amin’ny fanatsarana ny fiainan’ny mponina. Tsy mitsaha-miakatra ny vidim-piainana ary mitohy ny kolikoly sy ny fanaparam-pahefana ary ny tsy fandriam-pahalemana.

Tsy hita izay vahaolana aroson’ny mpitondra amin’ireo sehatra mankarary ny mponina ireo fa vitavitan’ny fanambarana sy ny fihetsiketsehana etsy sy eroa. Mody mizara vary sy menaka ary tsaramaso, na ihany koa masomboly sy tranon-tantely  amin’ny olona vitsy dia vitsy izay raha isaina dia tsy ampy 0,1%n’ny vahoaka malagasy akory. Dia izany ve no ireharehan’ny mpitondra fa mihaino sy mahita ary mitondra vahaolana ho an’ny vahoaka izy ireo. Ny vary sy tsaramaso nozaraina tamin’ny fianakaviana vitsivitsy monina eto an-drenivohitra tamin’iny faran’ny herinandro iny izao efa lany sahady dia tsy manan-ko hanina indray ireo nahazo fanampiana vao nitsidika ny omaly alatsinainy.

Tsy fizarana fanomezana kely madinidinika amin’ny sokajin’olom-bitsy notsongaina no atao hoe fitsinjovana ny sosialim-bahoaka fa ny fampidinana ny vesatry ny vidim-piainana. Mila vidin’entana mora ny vahoaka ary mila asa ihany koa hahafahany mitady vola hamelomany ny tenany sy ny fianakaviany ary hahafahany mampandroso ny firenena. Ambony loatra ny vidim-piainana eto Madagasikara ary raha atao tomba-maso tsotra dia ny fiakaran’ny hetra isan-karazany no tena mahatonga izany ankoatra ny fahambanian’ny sandan’ny ariary. Tsy hita anefa izay vokatra azo amin’ny fampiasana ireo hetra voaangona. Raha ny fanazavan’ireo mpitondra ambony dia lany anakaramana ny mpiasam-panjakana sy ampiodinana ny sampan-draharaham-panjakana fotsiny ny hetra fa tsy misy ambiny hampiasaina hanaovana tetikasam-pampandrosoana. Izany hoe natao hamelona ny mpiasam-panjakana fotsiny izany ny vahoaka nefa tsy hita izay tambiny sy tombony azo avy amin’izany.

Misy fitantanana tsy mahomby ao matoa tsy mandeha araka ny tokony ho izy ny asa fampandrosoana. Mbola misy dia misy tokoa ny kolikoly sy ny kitranoantrano ao anatin’ny fitantanan-draharaham-panjakana rehetra koa tsy mahagaga raha tsy mety mandeha amin’ny tokony ho izy ny asa fampandrosoana nampanantenain’ny filoha. Mbola maro ny sokajin’olona mamboly voky tsy mamboly voky ary havanana amin’ny fitavanana ny volam-panjakana sy tombontsoa mihoa-pampana any anaty sampan-draharaha any. Ireny olona ireny no anisan’ny fanetry be tsy mampandroso ity firenena ity. Mody hoe mpikambana anaty kabinetra nefa tsy haninon-tsy haninona fa mitsentsitra ny hatsembohan’ny vahoaka malagasy fotsiny. Efa feno kosa angamba izao ny fepetra hanafoanana ireny katsentsitra ireny tsy hanao ampihi-mamba ny volam-bahoaka intsony.

Ravalo tsy Manana